देवगड (स्वप्निल लोके)
तीनशे वर्षांचा दिव्य संगम: मिठबाव गावचा श्री देव रामेश्वर आणि श्री देव कुणकेश्वराची अविस्मरणीय भेट
देवगड तालुक्यातील मिठबाव, तांबळडेग आणि कातवण या तीन गावांचे ग्रामदैवत श्री देव रामेश्वर सुमारे तीनशे वर्षांनी एकत्र येऊन, परंपरेनुसार श्री देव कुणकेश्वराच्या भेटीसाठी प्रवास करण्याचा अद्भुत राजयोग जुळला आहे. हा पुरातन आणि भक्तिमय सोहळा गावकरी, अबालवृद्ध, बालगोपाळ मंडळी आणि सर्व भक्तजनांना एकत्र आणणारा दिव्य अनुभव आहे.
तीनशे वर्षांचा दिव्य राजयोग
तीनशे वर्षांच्या अंतराने ही भेट जुळणे केवळ वेळेचीच नाही तर श्रद्धा, परंपरा आणि भक्तीचा संगम आहे. आपल्या पारंपरिक मार्गाने, संपूर्ण गावघर रयत सोबत घेऊन श्री देव रामेश्वराने श्री देव कुणकेश्वर भेटीचा हुकूम दिला. हा क्षण इतका अविस्मरणीय आणि दुर्मिळ होता की अनेक वर्षांनी एकदा हा दिव्य योग साकार झाला.
महाशिवरात्रीचा दिव्य क्षण
महाशिवरात्रीच्या पवित्र रात्री, साडेदहा नंतर, श्री देव कुणकेश्वर व श्री देव रामेश्वराची भेट एक अनोख्या भक्तीमय वातावरणात घडली. या ऐतिहासिक क्षणी, देवस्वारी बरोबर असलेल्या सर्व रयतेने दर्शन घेतले. जवळपास दोन ते अडीच हजार गावरयत या दिव्य सोहळ्याचे साक्षीदार होते, ज्यांनी या अपूर्व क्षणाला आपल्या हृदयात कैद केले.
देवस्वारीची सहा दिव्य भेट
कुणकेश्वर भेटीनंतर एक अद्भुत योग तयार झाला ज्यात सहा देवस्वाऱ्यांची भेटही घडली. या भेटीचा उल्लेख दुग्ध-शर्करेच्या योगासारखा केला जातो.
समुद्रतीर्थ आणि तीर्थस्थान: सकाळी सव्वानऊ वाजता श्री देव रामेश्वर पवित्र तीर्थस्थानासाठी समुद्रतीर्थावर उतरत असतानाच शिरगाव पावणादेवीची भेट घेतली आणि तीर्थस्थानही संपन्न झाले.
नारिंग्रे श्री देव गांगोश्वराची भेट: तीर्थस्थान करून माघारी येताना, नारिंग्रे श्री देव गांगोश्वराची, श्री देव भैरव मंदिरासमोर भैरवाच्या साक्षीने भेट झाली. या प्रसंगी देवस्वारी आणि सोबत आलेल्या प्रमुख मानकरी यांचा भैरवस्थळी विशेष सम्मान करण्यात आला.
माईन येथील श्री देव माधवगिरीची भेट: पावणादेवी स्थळी परतत असताना माईन येथील श्री देव माधवगिरीची भेट घेतली गेली.
भाव-बहिणीची भेट: श्री देव कुणकेश्वर पावणादेवी मंदिरात देवीच्या भेटीला येत असताना जवळच्या भाव आणि बहिणी थांबून उबदार स्वागतासाठी तयार होत्या.
आचरा आणि जामसंडे दिर्बादेवीची भेट : मोठा भाऊ असलेल्या आचरा श्री देव रामेश्वराच्या भेटीसाठी जवळपास तीन तास कुणकेश्वर पावणादेवी स्थळात (मिठबाव रामेश्वर व जामसंडे दिर्बादेवी रामेश्वर) वाट पाहत विसावा घेतला. नंतर, पुढील तारामुंबरी प्रवासासाठी दिर्बादेवी मार्गस्थ होत असतानाच वाटेत मोठा भाऊ आचरा आणि जामसंडे दिर्बादेवीची भेट झाली. दुपारी साडेतीन वाजता पावणादेवी मंदिरात या दोन्ही देवस्वाऱ्याची भेट पुन्हा झाली आणि नंतर ते दोघे आपल्या पुढील प्रवासासाठी मार्गस्थ झाले.
भक्तीची पुनर्मिलन: माघारी येताना, नारिंग्रे श्री देव गांगोश्वराची, माईन येथील श्री देव माधवगिरीची आणि इतर देवस्वाऱ्यांची भेट झाली. या भेटीत प्रत्येक टप्प्यावर भक्तीचे नवे रंग उमटले.
भक्ती आणि परंपरेचा संगम
या दिव्य सोहळ्याचे साक्षीदार होण्याचे भाग्य मिळाल्याने संपूर्ण गावघरात आनंदाची लहर पसरली. प्रवास जरी काट्याकुट्यातून असला तरी पारंपरिक मार्गाने देवस्वारी जात असण्यामुळे हा अनुभव अधिकच भक्तीमय आणि स्मरणीय झाला .अबालवृद्ध, बालगोपाळ मंडळी आणि सर्व गावकरी तहान-भूक विसरून या कार्यात हिरहिरीने सहभागी झाले, ज्यामुळे हा सोहळा एक अतुलनीय भक्तीचा उत्सव बनला.
तीनशे वर्षांच्या अंतराने घडलेल्या या दिव्य सोहळ्यामुळे भक्ती, परंपरा आणि संस्कृतीचा संगम पुन्हा एकदा अधोरेखित झाला आहे. श्री देव रामेश्वर आणि श्री देव कुणकेश्वराच्या भेटीचा हा अद्वितीय दर्शन सोहळा भविष्यातही गावकरी आणि भक्तजनांच्या स्मरणात अजरामर राहतील. हा दिव्य संगम केवळ एक धार्मिक यात्रा नसून, आपल्या मनाच्या आतल्या श्रद्धेची आणि परंपरेची खरी झलक आहे.
हर हर महादेव! जय श्री रामेश्वर !