देवगड
शतकानंतरचा मिलन सोहळा: रामेश्वर भावंडांची ऐतिहासिक भेट
कोकणच्या पावन भूमीत असंख्य मंदिरांचा इतिहास, श्रद्धा आणि भक्तीचा वारसा दिसून येतो. याच परंपरेतील एक ऐतिहासिक सोहळा म्हणजे मिठबाव श्री देव रामेश्वर, आचरा श्री देव रामेश्वर, आणि जामसंडे दिर्बा रामेश्वर यांची सुमारे तीनशे वर्षांनंतर होणारी भेट. हा अनोखा क्षण श्री देव कुणकेश्वराच्या साक्षीने घडत आहे,आणि या ऐतिहासिक सोहळ्यासाठी संपूर्ण कोकणातील भाविकांचे हृदय भक्तिभावाने भरून आले आहे.
तीनशे वर्षांनंतरच्या भेटीची उत्सुकता
मिठबाव श्री देव रामेश्वर तब्बल ३०० वर्षांनी आपल्या भावाला, श्री देव कुणकेश्वराला, भेटण्यासाठी मार्गस्थ झाला आहे. या भेटीपूर्वी, आचरा श्री देव रामेश्वर व मिठबाव श्री देव रामेश्वर यांनी एकत्र येऊन एकमेकांची भेट घेतली. ही भेट म्हणजे केवळ धार्मिक सोहळा नव्हे, तर भावनिक आणि ऐतिहासिक क्षण होता. ज्या रामेश्वर भावंडांची गाठ कधी काळी सुटली होती, ती पुन्हा जोडली जात आहे, हे दृश्य भाविकांसाठी आनंदाश्रूंचे कारण बनले आहे.
तीन वेगवेगळ्या मार्गांनी येणारा सोहळा
या ऐतिहासिक भेटीचा पारंपारिक मार्ग हा पूर्वापार वेगळा राहिला आहे. आचरा श्री देव रामेश्वर, मिठबाव श्री देव रामेश्वर आणि जामसंडे दिर्बादेवी रामेश्वर असे तीन भाऊ व बहिण आज वेगवेगळ्या दिशांनी मार्गस्थ झाले आहेत, परंतु त्यांचे गंतव्य एकच – श्री देव कुणकेश्वर. कुणकेश्वर शिवतीर्थावर ही भेट होणार असून,हा सोहळा डोळ्याने पाहण्यासाठी, मनात साठवण्यासाठी आणि संस्कृतीचा अभिमान बाळगण्यासाठी कोकणातील नागरिक आतुर झाले आहेत.
कुणकेश्वर: कोकणातील पवित्र शिवतीर्थ
कुणकेश्वर हे कोकणातील एक महत्त्वाचे धार्मिक स्थळ आहे. याला ‘कोकणातील काशी’ असेही संबोधले जाते. याठिकाणी हजारो वर्षांची परंपरा असलेले शिवमंदिर असून, महादेवाची आराधना करण्यासाठी देशभरातून भाविक येथे येतात. अशा पवित्र स्थानी रामेश्वर भावंडांची भेट होणे, हा केवळ धार्मिक नव्हे तर सांस्कृतिक दृष्टिकोनातूनही महत्त्वाचा सोहळा आहे.
भाविकांचा उत्साह आणि श्रद्धेचा जागर
हा ऐतिहासिक सोहळा प्रत्यक्ष पाहण्यासाठी कोकणातील असंख्य भक्तगण जमले आहेत. मंदिराच्या प्रांगणात भक्तीमय वातावरण आहे. पारंपरिक वाद्यांचा गजर, ओम नमः शिवायच्या जयघोषात गजबजलेल्या रस्त्यांवर भक्तिभावाने नतमस्तक होणाऱ्या भाविकांची मांदियाळी पाहायला मिळते. या सोहळ्यामुळे केवळ श्रद्धेचा जागर होत नाही, तर कोकणातील ऐतिहासिक आणि पारंपरिक धार्मिक एकता देखील अधोरेखित होते.
एक ऐतिहासिक क्षण – नवी परंपरा निर्माण करणारा सोहळा
ही भेट म्हणजे भूतकाळाशी नाळ जोडण्याचा प्रयत्न आहे. अनेक वर्षांनी एकत्र येणारी ही दैवते ही कोकणवासीयांसाठी एक अनमोल भेट आहे.
ही ऐतिहासिक भेट म्हणजे केवळ शतकानंतरचा सोहळा नाही, तर कोकणाच्या संस्कृतीची, परंपरेची आणि श्रद्धेची ओळख नव्याने जगासमोर आणणारा एक ऐतिहासिक क्षण आहे.
हर हर महादेव !
