देवगड (प्रतिनिधी)
सत्तेचा माज करणाऱ्या अशा मंत्र्यांना मुख्यमंत्री देवेंद्र फडणवीस यांनी लोकशाहीचा धडा द्यावा – विनायक राऊत
विरोधी ग्रा.पं.ला निधी देणार नाही, असे वक्तव्य करून पालकमंत्री नितेश राणे यांनी मंत्री म्हणून घेतलेल्या शपथेचा भंग केला आहे.त्यांच्यासमोर लाचार होणाऱ्यांना फक्त निधी मिळेल. लोकशाहीचे मंदीर म्हणून ग्रामपंचायतीकडे पाहतों याच लोकशाहीच्या मार्गाने निवडून आलेल्या ग्रामपंचायतींना सापत्नपणाची वागणूक नितेश राणे हे देत आहेत.या कृतीचा आपण निषेध करीत असून विरोधी ग्रामपंचायतींना सत्ताधाऱ्यांनी निधी दिला नाही तर प्रसंगी न्यायालयाकडे दाद मागणार असा इशारा उबाठा शिवसेना पक्षाचे सचिव तथा माजी खासदार विनायक राऊत यांनी दिला.सत्तेचा माज करणाऱ्या अशा मंत्र्यांना मुख्यमंत्री देवेंद्र फडणवीस यांनी लोकशाहीचा धडा द्यावा, असा टोलाही राऊत यांनी लगावला.
देवगड तालुका उबाठा शिवसेना संपर्क कार्यालयात आयोजित पत्रकार परिषदेत माजी खासदार विनायक राऊत हे बोलत होते.यावेळी युवासेना जिल्हाप्रमुख सुशांत नाईक, तालुकाप्रमुख रविंद्र जोगल, जयेश नर,युवा सेना तालुकाप्रमुख गणेश गावकर,महिला आघाडीप्रमुख सौ.हर्षा ठाकूर,सायली घाडीगावकर, माजी सभापती रेश्मा सावंत, प्रतिक्षा साटम, निनाद देशपांडे आदी उपस्थित होते.
राऊत म्हणाले, आपला सिंधुदुर्ग जिल्हा हा सैतानांच्या हातात गेला आहे.मीच करीन ती पुर्वदिशा अशी सत्तेची मस्ती आली असून विचारी लोकांच्या महाराष्ट्र राज्यातील सिंधुदुर्ग जिल्ह्यात सत्तेची मस्ती डोक्यात गेल्याने नितेश राणे हे उबाठा शिवसेना पक्षाच्या सरपंचांना निधी देणार नाही असे वक्तव्य करीत आहेत.लाचारांना निधी देणार परंतू लोकशाही मार्गाने निवडून आलेल्या सरपंचांना निधी देणार नाही.या वक्तव्याचा निषेध करीत असून शासकीय निधी ही वडीलोपार्जित मिळकत नाही तर जनतेच्या करातून डीपीडीसीला फंड मिळतो.निधी दिला नाही तर प्रसंगी न्यायालयात जाणार असा इशारा राऊत यांनी दिला.